(საქართველოს რესპუბლიკა) რეზო ჩხეიძის თხოვნას "ქართული ერთობის დარბაზი" ახმიანებს

რეზო ჩხეიზე : „ეს არის ჩემი თხოვნა, ... იქნებ უკანასკნელიც...“

ლაზარეს აღდგინების დღეს, 4 აპრილს, სამების საკათედდრო ტაძრის ახალგაზრდულ ცენრტრში, "ქართული ერთობის დარბაზის" დამფუძნებლებმა, საინტერესო იდეა გაახმიანეს. იდეა ცნობილ კინორეჟისორს, მშვიდობის მსოფლიო ელჩს ბატონ რეზო ჩხეიძეს ეკუთვნის."ჯარისკაცის მამის ავტორმა წერილით მიმართა "ქარტული ერთობის დარბაზს" სადაც ნათქვამია. 

„მომდევნო 2016 წელი შოთა რუსთაველის საიუბილეო წელია. 850 წელი სრულდება გენიალური პოეტის დაბადებიდან. მქონდა ბედნიერება, ვყოფილიყავი 800 წლის იუბილის ერთ-ერთი ორგანიზატორი. ეს, მართლაც მსოფლიო დღესასწაული იყო სრულიად საქართველოსთვის. ჩვენ ყველამ ერთად  უნდა შევძლოთ, რომ დიდი მგოსნის 850 წელი გაცილებით უფრო მასშტაბური გახდეს, იუნესკომ მიიღოს გადაწყვეტილება ამის თაობაზე და ეს იუბილე აღინიშოს არა მარტო საქართველოში, არამედ მთელ მსოფლიოში.

სწორედ ამიტომ უნდა მოვიწვიოთ ყოველთა ქართველთა, საქართველოს შვილთა და საქართველოს მეგობართა მსოფლიო კონგრესი ოქტომბრის თვეში, თბილისობის დღეებში. შოთა რუსთაველის სახელთან დაკავშირებულმა ამ დიდმა საერთაშორისო ფორუმმა უნდა შეგვაძლებინოს საქართველოს შვილთა და საქართველოს მეგობართა დიდი მობილიზება, როგორც ქვეყნის შიდა პრობლემების გადასაწყვეტად, ასევე ქვეყნის საერთაშორისო ავტორიტეტის ასამაღლებლად. ამ გენიალურმა პოეტმა და მსოფლიო კონგრესმა უნდა გაგვაერთიანოს მთელ მსოფლიოში მიმობნეული საქართველოს შვილები და საქართველოს ნამდვილი მეგობრები. ეჭვი არ მეპარება, რომ გვექნება ხელისუფლების დიდი მხარდაჭერა. მეამაყება, რომ „ქართული ერთობის დარბაზი“ ემიჯნება ყოველგვარ დაპირისპირებას და საქმიანობის მთავარ მიმართულებად მოქმედებათა ჰარმონიზაციას მიიჩნევს. ეს, მართლაც, საშური საქმეა. დაპირისპირება სუსტების მოგონილია, თანამშრომლობის ჰარმონიზაცია -  მხოლოდ ძლიერთ ხელეწიფებათ.

მსოფლიო პოეზიის ერთი დიდი მწვერვალის, გენიალური შოთა რუსთაველის იუბილე ჩვენი სიძლიერისა და ჩვენი ერთობის დემონსტრირებად უნდა ვაქციოთ ხალხმა და ხელისუფლებამ.  ეს არის ჩემი თხოვნა, ჩემი ასაკისა და ჯანმრთელობის გამო, იქნებ უკანასკნელიც...ვიქნები ბედნიერი, თუ საქართველოს გაზეთები და ტელევიზიები მხარს დაუჭერენ ჩემს მოსაზრებას. მათ მიმართაც აღარ მექნება მეტი თხოვნა.

გვიყვარდეს საქართველო! გავუფრთხილდეთ საქართველოს! დავიცვათ საქართველო!“

სამების ტაძრის ახალგაზრდულ ცენტრში ამ უაღრესად ეროვნული იდეის სრული მხარდაჭერა გამოხატეს ხელოვნებისა და კულტურის ცნობილმა წარმომადგენლებმა:  მაყვალა გონაშვილმა,  ბაღათერ არაბულმა, ლევან მხეიძემ, გიორგი შხვაცაბაიამ, ომარ მხეიძემ, რომან რურუამ და სხვებმა. ქალბატონმა მაყვალა გონაშვილმა სიმბოლური და მრავლისმეტყველი უწოდა იმას, რომ ეს დიდი იდეა სამების ტაძარში გაჟღერდა და სწორედ დიდ ქართულ დღეს:  ლაზარეს აღდგინებისა და ქართული ენის დღეს.

„ბატონმა რეზო ჩხეიძემ ააშენა ლაზარეს ეკლესია კინოსტუდიის ტერიტორიაზე და ჯერ კიდევ წლის დასაწყისში, ძველით ახალი წლის წინა დღეებში, მის საკუთარ სახლში, გვესაუბრა ამ საკითხებზე ამ ეკლესიის მოძღვარს, მამა გიორგის, მის უმცროს მეგობარს, ანზორ ბაბუხადიას და მის უახლოეს ნათესავს, ინეზა ავალიანს... ვარ ბედნიერი, რომ რამდენჯერმე ვესწრებოდი საქართველოს კათოლიკოს-პატრიარქისა და ბატონი რეზოს ამ განწყობის  დიდ ქართულ საუბარს, ვარ მონაწილე ბატონი მერაბ ბერძენიშვილისა და ბატონი რეზოს დიდი საუბრისა ამ საკითხებზე“, - განაცხადა გელათის მეცნიერებათა აკადემიის წევრმა, თეიმურაზ შაშიაშვილმა  და გამოთქვა რწმენა, რომ ამ დიდ ქართულ საქმეს ასეთივე მხარდაჭერა ექნება ქვეყნის სამეცნიერო წრეებში, შემოქმედებით კავშირებში, განათლების მთელ სისტემაში.

„ქართული ერთობის დარბაზის“ სახელით გაკეთდება მიმართვა საქართველოს პრემიერ-მინისტრის, ბატონ ირაკლი ღარიბაშვილის, საქართველოს პრეზიდენტის, ბატონ გიორგი მარგველაშვილის და საქართველოს პარლამენტის თავმჯდომარის, ბატონ დავით უსუფაშვილის მიმართ.

„ქართული ერთობის დარბაზის“ დამფუძნებლებმა და წევრებმა, რომან რურუამ, ომარ მხეიძემ, რამაზ ლომინაძემ, ირაკლი მაჭავარიანმა, ლეონ ფირცხალავამ, ალექსი კობაიძემ, როლანდ კილაძემ, ვახტანგ ქიზიყურაშვილმა, ზაურ ტყეშელაშვილმა აღნიშნეს, რომ ეს საკითხი უმთავრესი იქნება „ქართული ერთობის დარბაზის“ ზუგდიდის კონგრესზე, რომელიც ერთ თვეში გაიმართება.

სამების ტაძრის ახალგაზრდული ცენტრის შეხვედრის მონაწილეებმა დიდი მადლიერება გამოხატეს  ბატონი რეზო ჩხეიძის მიმართ, უსურვეს მას მალე გამოჯანმრთელება და იმედი გამოთქვეს, რომ გენიალური მწერლის 850 წლის იუბილეს სწორედ დიდი მამულიშვილი, რეზო ჩხეიძე გახსნის.

„ქართული ერთობის დარბაზის“ დამფუძნებლებმა გუშინ სპეციალური განცხადება გაავრცელეს, სადაც ნათქვამია, "„ქართული ერთობის დარბაზის“ დამფუძნებლები ღრმა პატივისცემას ვუდასტურებთ ბეჭდვითი და ელექტრონული მედიის ხელმძღვანელებს, უდიდეს მნიშვბელობას ვანიჭებთ მათთან თანამშრმლობას, ვთვლით, რომ  ჩვენგან მასალის გვიან მიწოდება არის მიზეზი იმისა, რომ  შაბათს, სამების საკათედრო ტაძარში რეზო ჩხეიძის სახელით გაჟღერებული  ეს უაღრესად ეროვნული განწყობის ინფორმაცია ვერ მოხვდა ორშაბათის გაზეთის ფურცლებზე, საინფორმაციო საშუალებებში. თუ მხედველობაში არ მივიღებთ სააგენტოებს „რეპორტიორი“ და „GNNEWS”

ჩვენი პოზიცია უცვლელია: დაპირისპირებით და ზიზღით სავსე პოლიტიკურ სივრცე სათნოებით  და სიყვარულით უნდა შეიცვალოს, კონფრონტაცია პრინციპულობამ უნდა შეცვალოს... ჩვენ  ვემიჯნებით ყოველგვარ დაპირისპირებას, ერთმანეთის ლანძღვა-გინებას, ერთმანეთზე ზიზღით საუბარს და ჰარმონიზაციის რთულ და ძნელ გზას ვირჩევთ. ამიტომ გვჭირდება ყოვეთა ქართველთა, საქართველოს შვილთა, საქართველოს მეგობართა მსოფლიო კონგრესიც და შოთა რუსთაველიც და მისი ვეფხისტყაოსანიც, ამიტომ გვჭირდება ჟურნალისტების დიდი მხარდაჭერაც.

 გვწამს და გვჯერა:  სიყვარული აღგვამაღლებს. 

საქართველოს რესპუბლიკა

7.04,2015წ