რეზო ჩხეიძე: მაქვს პატივი, მოგიწვიოთ "ქართული ერთობის" კონგრესზე

"ქართული ერთობის დარბაზის" "თავმჯდომარემ რეზო ჩხეიძემ, 9 მარტს თბილისში დაგეგმილ  ქართული ერთობის კონგრესის მოწვევა გაუგზავნა ცნობილ ქართველ მხატვარს ზურაბ წერეთელს. 

მოწვევის ტექსტში ნათქვამია: 

"ბატონო ზურაბ, 

მაქვს პატივი, ჩემი და ჩემი მეგობრების, ცნობილი მოღვაწეების: ბატონების ანზორ ერქომაიშვილის, გივი თოიძის, ტარიელ ხარხელაურის, თემურ გუგუშვილის, ომარ მხეიძის, არნოლდ გეგეჭკორის, რომან რურუას და რამაზ ყურაშვილის სახელით მოგიწვიოთ "ქართული ერთობის" კონგრესზე, რომელიც შედგება 9 მარტს თბილისში, შოთა რუსთაველის სახელობის აკადემიურ თეატრში. 

დაინტერესების შემთხვევაში, ყველა ინფორმაცია ამ კონგრესთან დაკავშირებით შეგიძლიათ მიიღოთ.

ვებ.გვერდი: www. qartuliertobisdarbazi.blogspot.com 

„ქართული ერთობის დარბაზის“  ფეისბუქის გვერდი
 
ელ.ფოსტა.: qartuliertobisdarbazi@gmail.com  

და ჩვენს მიერ დაარსებული ტელეკომპანიით "ქართული" , რომლის ნახვა უცხოეთში მცხოვრებთ შეგიძლიათ  მისამართზე.

http://www.myvideo.ge/?act=dvr&chan=qartuli

ჩვენი დიდი სურვილია, თბილისის კონგრესი, რომელიც პირველი იქნება 8 თებერვალს, დავით აღმაშენებლის დღეს გელათის აკადემიის ისტორიულ შენობაში მისი გახსნის შემდეგ,  განსაკუთრებულ მოვლენად იქცეს. თბილისის კონგრესი მიიღებს "მოქმედების მანიფესტს" და  განიხილავს კონცეფციას დიდი ქართული პროექტისა "საქართველო დაჭრილი მზეა" . 

თბილისის შემდგომ კონგრესი გაგრძელდება რეგიონებში ( უახლოესი 18 მარტს ბათუმში), პირველი ეტაპი დამთავრდება 6 მაისს, გიორგობას და იგი გადაცემული იქნება ტელეკომპანია "ქართულის" პირდაპირ ეთერით... 

მაისიდან სექტემბრის ჩათვლით კონგრესი მუშაობას გააგრძელებს საზღვარგარეთის ქვეყნებში, სადაც საქართველოს მოქალაქეთა დიდი კონცენტრაციაა  (თურქეთი, ესპანეთი, საბერძნეთი, იტალია, გერმანია, რუსეთი, უკრაინა, ბელორუსი) და დასრულდება საქართველოში, სავარაუდოდ 21 სექტემბერს, ღვთისმშობლობას, ყოველთა ქართველთა საერთაშორისო კონგრესით. 

ქვეყნისათვის ამ მძიმე ჟამს მხოლოდ ჩვენს ერთობას შეუძლია საქართველოს არათუ ღირსეული გამოსვლა ამ კრიზისიდან, არამედ მომავლის დიდი პროგრამის შემუშავება და მისი განხორციელების დაწყება. 
"მოქმედების მანიფესტში" განსაკუთრებული ხაზგასმა გავაკეთეთ ორ მომენტზე: 

პირველი - უნდა დამთავრდეს ანონიმური და ერთპიროვნული გადაწყვეტილებებისა და მოქმედებების დრო და დაიწყოს სოლიდარული მოძრაობა ქვეყნის გადარჩენისთვის;

მეორე - ყოველ დროში სახელმწიფო კაცები , ერის მამა-  დიდი ილია და მისი მიმდევდები - ფიქრობდნენ ისეთ საქართველოზე, სადაც ქვეყანას მართავს დემოკრატიულად არჩეული ხელისუფლება - ხელისუფლებას მართავს საზოგადოება - საზოგადოებას მართავს ინტელექტი  და ზნეობა. 

 სწორედ ეს არის მეცნიერული და ეროვნულ-სახელმწიფოებრივი აზროვნების შერწყმა, რომლის საფუძვლები ჯერ კიდევ ათი საუკუნის წინ შექმნა დავით აღმაშენებელმა გელათის აკადემიის დაარსებით. 

სწორედ ამ საკითხებზე გვექნება მსჯელობა თბილისის კონგრესზე 9 მარტს. ჩვენ განსაკუთრებულ მნიშვნელობას ვანიჭებთ თქვენს მონაწილეობას კონგრესის მუშაობაში და  გვინდა გიხილოთ კონგრესზე.

ჩვენ გვიდა გიხილოთ  დიდ თანამდგომად, როგორც ყოველთა ქართველთა კონგრესის მზადების, ასევე ტელეკომპანია "ქართულის", რომლის შექმნის აუცილებლობა დრომ მოიტანა და რომლის კონცეფციაც ქართულ სულს და ქართულ ცნობიერებას ეყრდნობა.

დარწმუნებული ვარ, ჩვენ ერთნი ვართ იმ შეფასებაში, რომელიც ხაზგასმით ჩავწერეთ კონგრესის მანიფესტში, რომ ქართული - ნიშნავს პლანეტარულ აზროვნებას, ვინაიდან ის, თავისი არსით, შინაგანი ბუნებით შორს დგას როგორც კოსმოპოლიტიზმის, ისე - ვიწრო ეროვნულ ჩარჩოებში ჩაკეტილი. ნაციონალიზმისაგან. 


დავდგეთ საქართველოსთვის! 


ღრმა პატივისცემით,

რეზო ჩხეიძე

მშვიდობის მსოფლიო ელჩი

22.02.2015წ


ასეთივე მოწვევები გადაეგზავნებათ უახლოეს დღეებში უცხოეთში მცხოვრებ სხვა ცნობილ თანამემამულეებს, რომელთა სია გამოქვეყნდება "ქართული ერთობის დარბაზის" ვებ.გვერდზე